По четврти пат се организира летна пракса за 40 студенти од УКЛО

Општина Битола, во соработка со Универзитетот „Св. Климент Охридски“ – Битола (УКЛО), и ова лето ја продолжува успешната традиција на унапредување на практичната настава за младите. По четврти пат, двете институции организираат универзитетска летна пракса која овозможува поголемо вклучување на студентите во работата на локалната самоуправа.

Оваа година, вкупно 40 студенти ќе добијат прилика да стекнат реално работно искуство. Нивниот ангажман ќе биде распределен низ различни одделенија на Општина Битола, во Советот на општината, како и во јавните претпријатија под надлежност на локалната самоуправа.

Градоначалникот Тони Коњановски им посака успешна пракса на студентите, нагласувајќи дека ваквите програми се од клучно значење за приближување на младите до институциите и за нивното разбирање како сервис на граѓаните. За време на разговорот со практикантите, Коњановски сподели и искуства од странство, каде што младите активно се вклучуваат во општинските администрации и тоа го гледаат како одлична шанса за професионален развој и општествена одговорност.

Ректорот на УКЛО, проф. д-р Игор Неделковски, истакна дека моделот што го применуваат Општина Битола и универзитетот веќе четири години претставува пример кој почнале да го следат и други државни институции, што е директна потврда за успешноста и квалитетот на оваа програма.

Праксата ќе се реализира во текот на месеците јули, август и септември.

Секој студент ќе биде вклучен во процесите во период од еден месец. За својот ангажман, студентите ќе добијат месечен нето надоместок во износ од 10.000 денари.