Мастерклас во Битола: Младинската мобилност како можност, а не само загуба - младите дебатираат за причините за барање можности надвор

Во Студентскиот информативен центар (СИЦ) при Универзитетот „Св. Климент Охридски“ – Битола (УКЛО) се одржа мастерклас на тема „Одлив на мозоци или циркулација на мозоци? Преиспитување на младинската мобилност“, посветен на еден од најклучните предизвици за младите во Македонија и регионот на Западниот Балкан.

Настанот, кој се одржа на 10 септември 2026 година, го организираше Димитар Атанасовски, Млад европски амбасадор, како дел од кампањата „ЕУ со ТЕБЕ“, во соработка со Универзитетот „Св. Климент Охридски“ – Битола и „Europe House Битола“.

Фокусот на дебатата беше насочен кон причините поради кои младите избираат да студираат, работат и живеат во странство, но и кон можностите за нивно враќање или одржување активна врска со матичната земја. Наместо младинската мобилност да се третира исклучиво како негативен феномен („одлив на мозоци“), учесниците дискутираа за концептот „циркулација на мозоци“ — идеја според која меѓународното искуство и стекнатите знаења можат да се претворат во можност за развој на локалните заедници.

Главни говорници на дебатата беа д-р Ана Ристевска, Андреј Гулабовски и проф. д-р Рената Петревска-Нечкоска. Во рамките на интерактивната дискусија, која ја модерираше Мартин Кочишки, присутните млади имаа можност отворено да разговараат, да поставуваат прашања и да ги споделат своите ставови.

Како еден од главните заклучоци од мастеркласот се издвои потребата од создавање услови во кои младите ќе можат професионално да напредуваат, додека истовремено со своето знаење, искуство и мрежа на контакти ќе придонесуваат за напредокот на сопствената средина.