Учениците од СОУ „Ѓорче Петров“ – Прилеп со емотивна меѓугенерациска средба го одбележаа денот на старите лица

Учениците од профилот Медицински сестри при СОУ „Ѓорче Петров“ од Прилеп, кои членуваат во Здравствено-едукативната секција, остварија топла меѓугенерациска средба со корисниците во Дневниот центар за стари лица со активно стареење.

Под менторство на стручните наставници Наташа Ванчева и Ленче Јованоска, идните медицински работници поминаа ден исполнет со разговоaри, дружење и споделување животни искуства со повозрасните сограѓани.

За време на посетата беше изработено симболично „Дрво на правата на старите лица“, каде корените ја симболизираат почитта и достоинството, додека гранките ги претставуваат правата, потребите и вредностите на повозрасните генерации.

Посебен акцент на настанот беше ставен на создавањето на „Книгата на меѓусебното учење“, каде учениците и постарите лица ги запишуваа своите размислувања за тоа што можат да научат едни од други:

Младите од повозрасните: Животно искуство, трпение, мудрост, почит, истрајност и вредноста на семејството.

Повозрасните од младите: Совладување на новите технологии, современи начини на комуникација, свежи идеи и младешка енергија.

Преку оваа хуманитарна и едукативна активност, средношколците покажаа дека покрај медицинските знаења, емпатијата и човечноста се клучни за нивната идна професија, потврдувајќи дека генерацискиот мост се гради врз взаемна почит и љубов.