Мицкоски за враќањето на пасошот на Марковски: Има груба манипулација од локален јавен обвинител

Има груба манипулација од локален јавен обвинител, соучесник во процесот, постои поинаков извештај од приложениот, ова нема така да заврши, рече Премиерот Мицкоски денеска во Битола осврнувајќи се на враќањето на пасошот на Марковски.

Прашан за став по враќањето на пасошот на обвинетиот за злоупотреби Борче Марковски, премиерот Христијан Мицкоски изрази мислење дека станува збор за груба манипулација од јавен обвинител, како што рече, соучесник во овој процес.

„Мислам дека тука има груба манипулација од еден локален јавен обвинител во Вишото јавно обвинителство, којшто е соучесник во овој процес и тоа нема така да заврши. Ако сакав да кажам име и презиме, ќе кажев име и презиме, не би сакал да шпекулирам со имиња и презимиња. Допрва ќе има истрага и ќе следи истрага за овој процес, затоа што од страната на надлежното Основно јавно обвинителство имаме поинаков извештај од тој којшто е приложен како записник од страна на Вишото јавно обвинителство овдека во Битола. Ова нема така да заврши“, одговори Мицкоски.