Млад прилепчанец меѓу 300 најдобри во светот: Михаил Марковски во борба за светска титула по англиски јазик откако влезе во најдобрите меѓу 93.000 натпреварувачи

Ученикот Михаил Марковски од ООУ „Гоце Делчев“ во Прилеп во Сполето, Италија ќе ги одмери своите познавања по англиски јазик на светското финале на престижниот меѓународен натпревар „Хипо“.

Достигнувањето на младиот Михаил доаѓа по извонредниот успех на национално ниво, каде што ја освои титулата шампион на Македонија во категоријата „Хипо 1“ и избори директен пласман на светското првенство.

Тежината и големината на овој успех ги потврдуваат и официјалните бројки. Имено, во овогодишниот циклус на натпреварот учествуваа дури 93.250 ученици од сите меридијани, додека во големата завршница во Италија успеаа да се пласираат само 300 најдобри ученици од над 70 држави, распоредени во пет категории. Михаил е меѓу ретките избрани кои ги претставуваат своите земји и општина Прилеп на највисоко ниво.

Пред заминувањето за Сполето, Михаил Марковски и неговата менторка, наставничката Матеја Велјановска-Спиркоска, остварија средба и со градоначалникот на Општина Прилеп, Дејан Проданоски. Посакувајќи им успех и одличен настап, градоначалникот истакна дека Прилеп е горд што има талентиран млад човек кој застанува рамо до рамо со најдобрите светски ученици.