На терен се утврдува фактичката состојба на старите моликови шуми и ефектите од мерките за шумска обнова

Денес работната група за зачувување на старата моликова шума составена од домашни експерти формирана со одлука на Влада ја одржа својата втора работна средба. Работата на експертите кои се претставници на надлежните институции се одвиваше на терен во рамки на НП Пелистер каде на лице место се утврдуваше фактичката состојба со старите моликови шуми како и ефектите од досега спроведените одгледувачки и обновителни мерки со цел попрецизно понатамошно делување и креирање на финалните заклучоци кои треба да се пратат до Влада најдоцна до крај на август 2026год.

Претставниците на Шумарски факултет, Инспекторатот за шумарство, Инспекторатот за животна средина и вработените од ЈУНП Пелистер се согласни дека е потребно да се направи следното:

- континуирано следење на сите процеси во моликовите шуми

- детално да се проучи и анализира фактичката состојба од аспект на обновување и здравствена состојба со цел овозможување на нејзин одржлив развој

- изработка на студија за заштита на моликовате шуми и студија за одгледување и обновување на моликовите шуми.

Паралелно експертите работат на усогласување на потребните мерки со законската регулатива која ги опфаќа шумите и животната средина.