Нова пречистителна станица во село Добромири: Општина Новаци инвестира во современа канализација и зелена енергија

Градоначалникот на Општина Новаци, Стевче Стевановски, изврши увид во новоизградената пречистителна станица во селото Добромири, која е клучен дел од ново поставената канализациона мрежа во ова населено место.

Проектот претставува современо и одржливо решение за третман на отпадните води, со што директно се влијае врз заштитата на животната средина и подобрувањето на квалитетот на живот на мештаните.

Според информациите од општината, пречистителната станица е составена од повеќе функционални сегменти:собирна шахта со Имхофов таложник, биолошки реактор и песочен филтер, собирни шахти со бајпас преливи, две муљни пумпи и компресорска станица со два нископритисни компресори (капацитет од 50–100 м³/час).

Особена карактеристика на овој објект е неговата енергетска независност и еколошка компонента. За напојување на пумпите се инсталирани 10 фотоволтаични панели со поединечна моќност од 545 W. Со користењето на обновливи извори на енергија драстично се намалуваат трошоците за електрична енергија, овозможувајќи поевтина и поекономична експлоатација на целиот систем.

„Ова е уште еден пример дека во Општина Новаци инвестираме во инфраструктура која не значи само изградба, туку долгорочно и одржливо решение за граѓаните. Со новата канализациона мрежа и пречистителната станица, жителите на Добромири добиваат подобри услови за живот, а нашата општина прави уште еден значаен чекор кон почиста животна средина и зелена иднина“, истакна градоначалникот Стевановски.

Од Општина Новаци порачуваат дека продолжуваат со реализација на инфраструктурни проекти кои оставаат трајна вредност за идните генерации.