Новаци да добие модерна теретана: Жителите го избраа победничкиот проект на финалната форумска сесија

Општина Новаци ја одржа четвртата и последна форумска сесија од проектниот форум во рамките на проектот „Зајакнување на општинските совети – Фаза 2“. На сесијата, која се одржа во општинската сала, зедоа активно учество бројни граѓани, претставници на месните заедници, јавните институции и граѓанските организации.

Преку отворен и транспарентен процес на гласање, граѓаните одлучија најголем приоритет и финансиска поддршка да добие предлог-проектот „Воспоставување и опремување на теретана во затворен простор во Општина Новаци“.

Новата спортско-рекреативна содржина произлегува од директната потреба на локалното население, со посебен фокус на младите. Проектот предвидува постоечка и целосно уредена општинска просторија да се опреми со модерна фитнес и кардио опрема, овозможувајќи им на жителите простор за физичка активност и рекреација во текот на целата година.

Градоначалникот на Општина Новаци, Стевче Стевановски, го истакна значењето на директното учество на заедницата во донесувањето одлуки. „Посебно значајно е што граѓаните директно учествуваа во изборот на проектот. Ова е суштината на форумскиот процес – заеднички да ги препознаеме потребите на заедницата и преку отворен и транспарентен процес да одлучиме во што ќе се вложуваат средствата. Гласот на граѓаните е патоказ за нашата Општина. Заедно одлучуваме, заедно создаваме подобри услови за живот во Новаци.“

Иницијативата има за цел да го поттикне здравиот начин на живот, социјалната инклузија и подобрувањето на општинската инфраструктура за сите генерации.

Проектот „Зајакнување на општинските совети – Фаза 2“ се реализира со поддршка од Амбасадата на Швајцарија во Северна Македонија, Министерството за локална самоуправа и Програмата за развој на Обединетите нации.