НОВ ЛИК НА 3 ПАРКОВИ ВО ПРИЛЕП: ЈКП „Комуналец“ со темелна обнова на 13.000 метри квадратни зеленило

Трите паркови во прилепската населба „Димо Наредникот“, кои се простираат на вкупна површина од 13.000 квадратни метри, деновиве го добиваат својот заслужен, обновен лик. Екипите на ЈКП „Комуналец“ – Прилеп спроведуваат темелна акција за уредување на овој препознатлив дел од градот.

Во рамките на активностите, целосно се исфарбани 73 клупи за одмор, со што повторно се става акцент на оваа населба, која е добро позната токму по големиот број места за релаксација. Покрај ова, во функција се ставени и трите чешми за вода, малата фонтана, како и езерцето со гејзери, со што на парковиот простор му се враќа целосниот сјај.

„Останува уште да се доуредат патеките од израсток на коров, по што овие паркови ќе бидат вистинско огледало на градот“, велат од Секторот „Паркови и зеленило“.

Акцијата продолжува низ целиот град

Од јавното претпријатие најавуваат дека ова е само дел од поголема иницијатива. Под мотото „Парк по парк“, комуналните служби продолжуваат со темелна обнова и ревитализација на зелените површини во сите градски населби.

Од ЈКП „Комуналец“ упатуваат и апел до локалното население за поголема еколошка свест и одговорност:

Да се чува поставената урбана опрема.

Отпадоците задолжително да се фрлаат во корпите.

„Чисто е убаво!“, потсетуваат од претпријатието, нагласувајќи дека одржувањето на убавиот лик на парковите зависи од сите граѓани.