Девојки од Битола учеа како да ги користат новите технологии

Повеќе од 300 девојки од пет градови ги унапредија своите AI и дигитални вештини преку Women in Tech Македонија.

Со голем интерес и повеќе од 1000 пристигнати пријави, успешно беше реализиран циклусот на четиричасовни едукативни работилници во рамки на проектот AI4HerWellbeing, на кои учествуваа над 300 девојки од Пехчево, Кочани, Куманово, Кавадарци и Битола.

Работилниците имаа за цел да ги поттикнат дигиталните вештини, безбедното користење на интернет и практичната примена на вештачката интелигенција, притоа ставајќи акцент и на зачувувањето на менталното здравје и благосостојбата во дигиталниот свет.

Во текот на четиричасовната програма, учесничките се запознаа со современи AI алатки кои можат да им помогнат во учењето, професионалниот развој и секојдневната продуктивност. Посебен фокус беше ставен на препознавање на ризиците во дигиталниот простор, заштита на личните податоци, критичко размислување при користење на онлајн содржини и создавање здрав однос кон технологијата.

Работилниците беа интерактивни и практично ориентирани, овозможувајќи им на учесничките не само да стекнат нови знаења, туку и веднаш да ги применат преку реални примери и практични вежби.

Обуките ги реализираа:

Цветанка Штерјова Бурзевска, професионален гешталт терапевт и терапевт по арт-терапија, која работеше на темите поврзани со менталното здравје, емоционалната благосостојба и влијанието на дигиталната средина.

Моника Ризовска Таневска, AI експерт, која ги водеше практичните сесии за користење на вештачката интелигенција, AI алатките за продуктивност и безбедното и одговорно користење на новите технологии.

Големиот интерес, бројот на пријави и активното учество на девојките уште еднаш покажуваат дека младите препознаваат колку е важно навремено да стекнат знаења и вештини за користење на новите технологии на безбеден, етички и продуктивен начин.

Проектот AI4HerWellbeing придонесува кон јакнење на дигиталната писменост, подобрување на благосостојбата и создавање поголема самодоверба кај младите девојки во користењето на вештачката интелигенција како алатка за личен и професионален развој.

Проектот е кофинансиран од Европската Унија, во рамките на мрежата Младински Хаб на Западен Балкан и Турција.