Зрели лубеници и сочни тикви, јаболки и круши - Од училишната градина директно на трпеза, идните земјоделски агрономи ги покажаа вештините

Стручното општинско земјоделско училиште „Кузман Шапкарев“ од Битола уште еднаш ја покажа на дело успешноста на практичната настава. Денеска ги покажаа свежо собраните зрели плодови од училишното стопанство, крунисувајќи ги месеците вложен труд, знаење и посветеност.

Богатиот род кој годинава го одгледаа опфаќа сочни црвени лубеници, портокалови и украсни зелени тикви, како и свежи круши и јаболка. Преку паролата „Од нашата градина – на трпеза!“, од училиштето истакнуваат дека практичната работа е клучниот столб во образованието на идните земјоделски агрономи и техничари.

„Денови исполнети со труд, знаење и практична работа. Денес ги береме плодовите на нашата работа во училишното стопанство. Учиме. Одгледуваме. Создаваме“, објавија од СОЗУ „Кузман Шапкарев“, споделувајќи фотографии од зрелите плодови.

Ова училишно стопанство веќе со години служи како реален полигон каде средношколците теориите од училница ги преточуваат во конкретни вештини на терен — од подготовка на земјиштето и садење, преку нега на културите, сè до финалната берба.