Општина Новаци и оваа година ја покрива школарината за сите свои бруцоши на државните универзитети

Општина Новаци ја продолжува традиционалната мерка за поддршка на младите и нивното образование. Сите студенти од прва година (бруцоши) од територијата на општината, кои се запишани на првиот циклус студии на државните универзитети во земјава, ќе добијат целосно покривање на школарината за оваа учебна година, соопшти градоначалникот Стевче Стевановски.

Оваа финансиска помош има за цел да им го олесни образовниот пат на младите и да обезбеди поддршка за нивните семејства.

„И оваа година, како и во изминатите години, Општина Новаци ќе им ја плати школарината на сите студенти од Општина Новаци од прва година, запишани на државните универзитети, прв циклус на студии. Со оваа мерка продолжуваме да вложуваме во младите, образованието и иднината на нашата општина. Заедно вложуваме во знаење. Заедно градиме иднина!“, истакна градоначалникот Стевановски.

За остварување на ова право, заинтересираните студенти треба да ја поднесат потребната документација во просториите на Општина Новаци.

Потребни документи за аплицирање се потврда од факултетот за статус на редовен студент, копија од лична карта и копија од трансакциска сметка.