Со коњи до 1.886 метри: НП Пелистер бара волонтери за градежна акција кај Св. Спас

Јавната установа Национален парк Пелистер, во соработка со локалното население од потпелистерското село Маловиште, започна со реализација на нов инфраструктурен проект на планината. Станува збор за изградба и поставување на нов мултифункционален објект во непосредна близина на познатата црква „Св. Спас“, лоцирана на 1.886 метри надморска височина, под самиот врв Вртушка (2.010 м.н.в.).

Оваа локација е една од најпосетуваните точки на Баба Планина во текот на целата година, па оттука се јави и реалната потреба од соодветно засолниште и логистичка точка.

Објект со двојна функција: За посетителите и за заштита на природата

Според информациите од НП Пелистер, новоизградениот објект ќе има двојна намена:

За посетителите: Примарно ќе биде во функција на сите планинари, туристи и добронамерници кои имаат потреба од засолниште или одмор при нивните планински тури.

За заштита на природата: Дополнително, објектот ќе го користи и редарската служба на паркот за поставување на специјализирана опрема наменета за мониторинг на флората и фауната и заштита на природните вредности во овој реон.

Транспорт со коњи до 1.886 метри надморска височина

Подготвителните активности започнаа изминатиов викенд под специфични планински услови. Поради непристапниот терен, градежниот материјал и дрвената граѓа до самата локација се транспортираа на традиционален начин – со помош на товарни животни (анимали).

Проектот се реализира со поддршка на неколку физички и правни лица, како и со финансиско партнерство на Министерството за животна средина и просторно планирање и Фондот за природа Преспа-Охрид (PONT).

Јавен повик за планинарите и љубителите на Пелистер

Бидејќи градежните работи ќе продолжат со интензивно темпо во текот на претстојните викенди, од Националниот парк упатуваат јавен повик за солидарност и акција до пошироката јавност.

„Со цел побрза реализација на предвидените активности, упатуваме јавен повик до сите планинари, љубители на природата и до сите верници кои се во можност да земат активно учество во работните активности.“ – стои во соопштението на НП Пелистер.

Сите заинтересирани граѓани и волонтери кои сакаат да помогнат во изградбата и да го дадат својот придонес за поуредена планина, можат да се пријават за учество на официјалниот е-маил на паркот: np.pelister@yahoo.com.