ПОЖАР ВО ЛОГОВАРДИ: Изгорени стотици бали сено и слама, илјадници килограми пченица и опрема

Голем пожар избувна на 5 август 2026 година во битолското село Логоварди, општина Новаци, при што целосно е изгорена плевна и големо количество земјоделски производи и опрема.

Според информациите од Министерството за внатрешни работи, настанот бил пријавен во СВР Битола истиот ден во 11:30 часот. Пожарот зафатил плевна сопственост на лицето В.Д. од селото Логоварди.

Во огнената стихија причинета е голема материјална штета. Опожарени се 800 бали сено, 600 бали слама, 3.500 килограми пченица, молзачка за млеко и други домаќински и земјоделски предмети.

Интервенирала екипа од Територијалната противпожарна единица (ТППЕ) Битола, која успеала целосно да го изгасне пожарот и да спречи негово понатамошно ширење.

На местото на несреќата увид извршила екипа од СВР Битола, по што се очекуваат повеќе детали за причините кои довеле до избувнување на пожарот.