На пожарот кај Подмочани се делуваше со поддршка од воздух со еден хеликоптер на МВР и два авиони „Ер Трактори“

Пожарот кој избувна во атарот на селото Подмочани и се прошири кон пониските делови на Националниот парк „Пелистер“ од преспанската страна е успешно локализиран благодарение на брзата и координирана интервенција на повеќе служби и доброволци, информираше вечерва градоначалникот на Општина Ресен, Јован Тозиевски.

Во акцијата за справување со огнената стихија беа вклучени екипите на ТППЕ Ресен и ТППЕ Битола, НП „Пелистер“, ЈКП „Пролетер“, Ренџерската служба на Општина Ресен, ЈП „Национални шуми“, Дирекцијата за заштита и спасување, како и бројни доброволни противпожарни друштва, јавни претпријатија и приватни субјекти.

Екипите останаа на терен во текот на целата ноќ, додека во текот на денот беше активирана и поддршка од воздух со еден хеликоптер на МВР и два авиони „Ер Трактор“.

„Состојбата во моментов е стабилна, но поради големината на зафатената површина и временските услови, опасноста од повторно ширење на пожарот сè уште постои“, истакна градоначалникот Тозиевски.

Тој изрази јавна благодарност до сите пожарникари, спасувачи, припадници на службите, приватни компании и граѓани кои несебично помогнаа во совладувањето на пожарот. Градоначалникот истовремено упати апел до сите граѓани на максимална внимателност и одговорно однесување при престојот во шумските предели во овој период на висок ризик од пожари.