Тошевски: Следи уште една пеколна и долга ноќ за спас на Пелистер од огнот - се настојува во текот на ноќта да се сузбие најкритичниот фронт од пожарот

Следи уште една пеколна и долга ноќ за сите нас кои остануваме на терен, соопшти предмалку директорот на Националниот парк Пелистер Иванчо Тошевски кој е дел од екипата која веќе втор ден е на терен во битката со огнената стихија на Пелистер.

„Главното дејство на силите во текот на ноќта ќе биди насочено по должина на границата помеѓу Национални шуми и Национален парк Пелистер во правец север - југ на надморска висина помеѓу 1050 - 1150 метри над т.н. битолски пат кој ги поврзува Превалец Ѓавато со с.Подмочани. Целта е да се искористат пониските температури во текот на ноќта и конечно да се сузбие најкритичниот фронт од пожарот.“-рече Тошевски.

Во моментов се работи на самиот фронт на огнот од непосредна близина.

„Во еден момент ја имате целосната контрола, но со првата промена на временските услови работите се менуваат во истиот момент. Екипите на НП Пелистер делуваат со поддршка на ДПД Архангел, ППЕ на РЕК Битола и ТППЕ Ресен. Најважно е високото ниво на мотивираност на единиците и покрај тоа што поединци се без спиење од скоро 48 часа.“-рече тој.