Прилеп добива три амбулантни возила за потребите на Итната медицинска помош - посигурен и подостапен итен медицински транспорт

По 14 години, Прилеп повторно е опфатен со владина набавка на нови амбулантни возила за потребите на Итната медицинска помош. Во рамки на набавката на 100 нови амбулантни возила, кои ќе бидат распределени низ здравствените установи во Македонија, за Прилеп се доделени три возила, со што за првпат од 2012 година се обезбедува вакво обновување на возниот парк преку Владата, соопшти прилепската болница.

Со новите возила ќе се подобрат условите во кои работат екипите на Итната медицинска помош, а граѓаните ќе добијат посигурен и подостапен итен медицински транспорт. За град како Прилеп, кој ги опслужува и жителите на околните населени места, дополнителните три возила ќе бидат од голем бенефит при секојдневните интервенции и транспортот на пациенти, велат од болницата.

Инаку, денеска во Скопје Министерот за здравство, Сашо Клековски денес заедно со премиерот Христијан Мицкоски ги промовираа 100-те нови возила за Итната медицинска помош во Македонија.

„Опремата во возилата е на сосема ново ниво: напреден дефибрилатор/монитор со пејсинг, ЕКГ и ST/QT мониторинг, кислородна и респираторна опрема за возрасни, деца и новороденчиња, вентилација/климатизација, автоматска носилка и систем за намалување на вибрациите“, истакна Клековски, додавајќи дека тоа ќе значи дека третманот на пациентот почнува уште во возилото, а не дури во болница.