ЈКП „Комуналец“ ги санира патеките во паркот кај Основниот суд во Прилеп

Екипите на ЈКП „Комуналец“ – Прилеп деновиве спроведуваат теренски активности за уредување на парковските површини, со посебен фокус на паркот лоциран кај Основниот суд.

Во рамки на денешните активности, се врши замена на дотраените и оштетени камени плочи кои се наоѓаат во непосредна близина на езерцата. Целта е да се подобри безбедноста на пешаците и да се врати естетскиот изглед на овој зачестен простор за одмор.

Од јавното претпријатие истакнуваат дека овој парк е меѓу најпосетуваните локации во градот, особено во летниот период, кога граѓаните барат ладовина и пријатен амбиент за релаксација.

Апелирајќи до свеста на сите посетители да го чуваат јавното добро, од „Комуналец“ потсетуваат дека во паркот се поставени доволен број корпи за отпадоци со цел одржување на хигиената.

„Да запомниме: Чисто е убаво!“, порачуваат од ЈКП „Комуналец“ – Прилеп.