Промовирана книгата „Моќта на невидливите херои“ и отворена изложбата „Боите на невидливото“

Во атмосфера исполнета со емоции, поддршка и заедништво, во Битола се одржа посебен настан посветен на подигање на свеста за мултиплекс склерозата. Социјално-културниот настан обедини три значајни поводи: промоцијата на книгата „Моќта на невидливите херои“, уметничката изложба „Боите на невидливото“ и одбележувањето на роденденот на здружението „Гласно за МС“.

Книгата „Моќта на невидливите херои“, чиј автор е Сања Поповска, носи 17 интимни и инспиративни приказни за хероини кои секојдневно се соочуваат со предизвиците на мултиплекс склерозата. Преку овие сведоштва за болката, надежта и истрајноста, авторката ја истакнува исклучителната внатрешна сила на жената да не се предава и да чекори напред и во најтешките моменти.

Авторката сподели и емотивен момент од промоцијата во чест на Билјана Јовановска, посочувајќи дека за неа во книгата има посебно место и посебна приказна. Билјана Јовановска, ЖЕНА, МАЈКА, КРАЛИЦА, БОРЕЦ - Во книгата "Моќта на невидливите херои" вечно ќе живееш - порача Поповска. Настанот беше дополнет и со волшебната изложба „Боите на невидливото“ од уметницата Ана Сиљаноска, чии слики преку бои и емотивен ликовен израз ги пренесоа невидливите внатрешни борби и чувства на луѓето кои живеат со оваа состојба.

Здружението „Гласно за МС“ со овој настан уште еднаш ја потврди својата мисија — да биде глас што не молчи и платформа каде што невидливите борби стануваат видливи.

Организаторите упатија искрена благодарност до сите присутни, поддржувачи и пријатели кои беа дел од овој незаборавен ден исполнет со љубов, емпатија и порака дека во оваа борба никој не е сам.