Промовирани нови сорти пченка и сончоглед во Новаци: Фокус на современото земјоделство и конкурентноста

Во Општина Новаци по седми пат се одржа традиционалната промоција на новите и постоечките сорти на хибридна пченка и сончоглед. Настанот беше организиран од Пољопривредниот институт Осијек од Хрватска, чиј овластен застапник за Македонија е компанијата „Семенарство Промет“.

На презентацијата присуствуваа голем број земјоделци од Пелагонискиот регион, кои веќе со години го користат овој семенски материјал и од прва рака го потврдуваат квалитетот и високите приноси.

Покрај официјалната презентација, градоначалникот на Општина Новаци, Стевче Стевановски, оствари работна средба во својот кабинет со претставниците на хрватскиот институт, професори од Факултетот за земјоделски науки и храна од Скопје и локални земјоделци.

На средбата се дискутираше за предизвиците со кои се соочуваат земјоделците во Пелагонија, примената на нови технологии и современи практики во аграрот, како и за стратегиите за зголемување на конкурентноста на македонските производи на домашниот и европскиот пазар.

„Современото земјоделство бара знаење, квалитетен семенски материјал, нови технологии и постојано следење на светските трендови. Како општина, ќе продолжиме да го поддржуваме земјоделскиот сектор и да создаваме услови за нашите земјоделци да бидат поконкурентни, поуспешни и подготвени за идните предизвици“, истакна градоначалникот Стевановски.

Општина Новаци уште еднаш ја потврди својата посветеност кон развојот на земјоделството како еден од клучните столбови на локалната економија, вели градоначалникот.