МАСОВНА ПРОСЛАВА ВО СКОЧИВИР: Верниците со заедничка молитва го чествуваа празникот Св. Архангел Гаврил

Голем број верници од Општина Новаци, но и од целиот регион, синоќа масовно го одбележаа големиот христијански празник посветен на Светиот Архангел Гаврил. Традиционално, духовното светилиште и манастирскиот комплекс „Св. Архангел Гаврил“ во селото Скочивир беше главното место каде што граѓаните се собраа на заедничка молитва, барајќи духовен мир, здравје и благосостојба.

По повод чествувањето на овој голем ден, градоначалникот на Општина Новаци, Стевче Стевановски ја истакна важноста на зачувувањето на традицијата и духовните вредности.

„Денес го одбележуваме празникот Св. Архангел Гаврил – Божјиот гласник и симбол на добрата вест, надежта и верата. По тој повод, многу верници и годинава се упатија кон манастирот „Св. Архангел Гаврил“ во Скочивир, каде што традиционално се собираат на заедничка молитва, духовен мир и чествување на празникот. Нека овој свет ден ни донесе здравје, љубов, благослов и спокој во секој дом. За многу години празникот!“ – истакна градоначалникот Стевановски.

Манастирот во Скочивир и оваа година се покажа како силен духовен центар кој ги обединува луѓето во знак на заедништво и меѓусебна почит. Верниците имаа можност да запалат свеќа за здравје, да присуствуваат на празничните богослужби и да поминат пријатни моменти во преубавиот манастирски амбиент.