Учениците од СОУ „Ѓорче Петров“ – Прилеп низ интерактивни работилници го чествуваа творештвото на македонскиот великан Конески

Културно-образовниот настан „За викенд кај Конески“ на едно место ги обедини литературата, зачувувањето на културното наследство и современите методи на интерактивно учење.

Во рамките на настанот беше промовирано делото „Дидактичка прошетка низ Небрегово со творештвото на Конески“ од авторите Паре Зареска и Александар Еленин, кое нуди нов и креативен пристап кон изучувањето на ликот и делото на Блаже Конески.

Втората активност опфати практична примена на содржините од публикацијата преку работилницата „Живо културно наследство“, во која активно учествуваа учениците од прва година од СОУ „Ѓорче Петров“ – Прилеп, како и работилницата на тема „Демистификација на литературното творештво“.

Преку овој настан, средношколците од СОУ „Ѓорче Петров“ имаа можност одблиску да се запознаат со културното наследство во родниот крај на Конески и преку практичен и интерактивен пристап да ја продлабочат својата љубов кон пишаниот збор и македонската литература.