Проширени услуги за репродуктивното здравје - ново советувалиште во битолската болница

Жените од Пелагонискиот регион за првпат добиваат пристап до безбеден медикаментозен абортус и проширени услуги за репродуктивното здравје во близина на нивното место на живеење. Ова е овозможено по отворањето на новото Советувалиште, кое е заедничка иницијатива на Асоцијацијата за здравствена едукација и истражување (ХЕРА) и Клиничката болница „Д-р Трифун Пановски“ во Битола.

Ова советувалиште е прво од ваков вид отворено надвор од Скопје. Неговото функционирање значително ќе ги намали географските и финансиските пречки со кои досега се соочуваа жените од овој регион кога станува збор за грижата за сексуалното и репродуктивното здравје.

Од ХЕРА истакнуваат дека ова претставува клучен чекор напред со кој се обезбедува навремена, современа и достоинствена здравствена заштита. Оваа услуга е од особено значење за жените кои доаѓаат од руралните средини, како и за оние од социјално маргинализираните заедници, кои често имаат отежнат пристап до ваков тип на медицински услуги.

Повеќе информации во врска со работата и услугите на новото Советувалиште граѓаните можат да најдат на официјалната веб-страница на ХЕРА (hera.org.mk).