Оспособен патот до мариовското село Будимирци и манастирот Св. Димитрија - извршена санација и уредување на патната делница

Извршена е целосна санација и уредување на патната делница која води до селото Будимирци и манастирот Свети Димитрија, со што значајно се подобруваат условите за движење во овој дел од Мариово, информираше градоначалникот на Општина Новаци, Стевче Стевановски.

Со градежните активности и теренското уредување се обезбеди подобар, посигурен и побезбеден пристап за локалното население, но и за сите посетители и верници кои редовно го посетуваат овој познат мариовски крај и неговите културно-верски обележја.

„Патот до Мариовското село Будимирци е оспособен. Извршивме санација и уредување на патот кој води до селото Будимирци и манастирот Св. Димитрија, со што обезбедивме подобар и побезбеден пристап за жителите и посетителите на ова наше Мариовско село“, истакна градоначалникот Стевановски.