Спасениот штрк Виктор полета, битолчани му спремаат дом за зимата

По серијата тажни вести кои деновиве ги брануваа социјалните мрежи, од локалното здружение за заштита на животните „Animal Voice“ пристигнува приказна која го враќа оптимизмот и ја стоплува душата.

Штркот Виктор, кој пред неколку недели беше пронајден паднат од гнездо и во животозагрозувачка состојба, успеа да се опорави благодарение на деноноќната борба на ветеринарите и активистите. Неговата борба за живот допре до стотици илјади луѓе на социјалните мрежи, а сега пристигнуваат најдобрите вести: Виктор конечно почна да лета.

Иако ги направи своите први успешни летови и веќе е целосно здрав, тој секогаш се враќа во прифатилиштето каде што го помина процесот на рехабилитација.

Од „Animal Voice“ објаснуваат дека штрковите самите чувствуваат дали се доволно силни за долгиот и исцрпувачки преселнички пат кон југ. Доколку Виктор реши да замине, патот му е целосно отворен.

Доколку процене дека не е подготвен за тој ризичен потфат, активистите се подготвени да му изградат соодветно и топло живеалиште каде безбедно ќе ја помине претстојната зима.

Оваа трогателна приказна уште еднаш ја покажа хуманоста на битолчани и неуморната работа на активистите кои секојдневно се борат за животните во регионот.