Општина Новаци им помага на младите: По 10.000 денари за 27 млади лица за полaгање за возачка дозвола

Општина Новаци продолжува со мерки за поддршка на младите, со цел да им овозможи подобри услови за осамостојување, поголема мобилност и личен развој.

Преку оваа мерка, 27 млади лица на возраст до 26 години од Општина Новаци ќе добијат еднократна финансиска помош во износ од 10.000 денари за стекнување возачка дозвола од Б категорија.

Градоначалникот на Општина Новаци, Стевче Стевановски, истакна дека стекнувањето возачка дозвола претставува важен чекор за младите, бидејќи им овозможува подобрен пристап до образованието, работата и новите животни можности.

„Со оваа финансиска поддршка директно вложуваме во младите и во нивната иднина, создавајќи услови за поголема самостојност, независност и нивно активно учество во општеството. Општина Новаци инвестира во младите, затоа што тие се иднината на нашата општина“, порача градоначалникот Стевановски.