Магијата на Ориентот во Битола: Турска вечер во Старата чаршија со мирис на баклави и сутлијаш

Старата битолска чаршија пулсираше во ритмите на традиционалниот турски мелос и мирисите на автентичните специјалитети. Здружението „Сфера Интернационал“ организираше културно-гастрономски настан кој привлече голем број битолчани и ја оживеа вековната врска меѓу градот на конзулите и турската култура.

Програмата беше вистинско патување низ традицијата. Посетителите имаа можност да уживаат во традиционални турски танци кои со својата динамика и колорит ја отсликаа богата фолклорна ризница. На една вечер чаршијата се претвори во гастрономско катче каде се дегустираа познати турски специјалитети, подготвени по автентични рецепти. Уличките беа исполнети со пријатна чаршиска атмосфера која потсети на старите времиња на дружење и меѓусебно почитување.

Традиција која битолчани ја чувствуваат како своја

Зад овој настан стои идејата за поврзување и прослава на заедничкото минато. Битолчани со воодушевување ја прифатија оваа иницијатива, истакнувајќи дека ваквите настани будат посебна носталгија.

„Турската култура и традиција ни се исклучително блиски. Тоа е наследство кое со векови е врежано во архитектурата, јазикот, храната и духот на Битола. Синоќа чаршијата едноставно дишеше во тој препознатлив дух,“ коментираат присутните граѓани.

Од „Сфера Интернационал“ изразија огромно задоволство од посетеноста и најавија дека и во иднина ќе продолжат со реализација на проекти кои ги зближуваат различните култури и ја збогатуваат културната понуда на градот. Вечерта заврши со многу насмевки, песна и порака дека мултикултурализмот е најголемото богатство на Битола.