Наместо со рушењето на диви гаражи во центарот на Битола да се реши еден проблем, се создаде нов - граѓани реагираат на смет и непријатна миризба

Откако локалните власти започнаа со акцијата за отстранување на бесправно поставените гаражи во центарот на Битола, наместо уреден и чист простор, граѓаните на оваа локација се соочуваат со нов еколошки проблем.

Битолчани кои живеат во овој дел од градот, преку социјалните мрежи упатија јавен апел и го изразија своето револтот од состојбата во која веќе десет дена се наоѓа нивното соседство.

Според нив, по туркањето на гаражите, просторот зад зградите прераснал во дива депонија преполна со расфрлан отпад.

„Живеам во центарот на градот Битола, но веќе десет дена се чувствувам како да живеам среде депонија, каде што мора да ги затворам сите прозорци и балкони за некако да го занемарам ова ѓубре што искрено вознемирува и мириса“, реагира една станарка.

Таа додава дека, иако го поддржува редот и отстранувањето на нелегалните објекти, клучно е граѓаните и надлежните да покажат поголема одговорност за одржување на хигиената.

„Да, нека се тргаат гаражите, но луѓето најпрво треба да си чистат. Некои тоа го прават, но има и други кои вака оставаат отпад. Како ќе се реши ова? На местото каде што се турнаа нелегалните гаражи, сега имаме отпад наместо уреден простор“, истакнува таа.

Жителите бараат итна интервенција од надлежните општински служби и комуналните претпријатија за комплетно расчистување на теренот, како и трајно урбанистичко уредување на просторот за да се спречи понатамошно трупање отпад во срцето на градот.