Кога училницата ќе стане хиподром: Топла средба и незаборавно дружење со коњите во „Аполон“

УЧЕЊЕ ПРЕКУ ПРАКТИКА: Учениците од СОЗУ „Кузман Шапкарев“ во посета на Коњичкиот клуб „Аполон“ во Битола

Со цел стекнување практични вештини и проширување на знаењата надвор од училишните клупи, учениците и дел од наставниот кадар од Средното општинско земјоделско училиште „Кузман Шапкарев“ од Битола остварија едукативна посета на Коњичкиот клуб „Аполон“.

За време на посетата, средношколците имаа единствена можност одблизу да се запознаат со сите аспекти на коњарството, правилното одгледување, исхраната и секојдневната грижа за коњите. Ваквиот пристап кон практичната настава им овозможи на учениците да го поврзат теоретското знаење со реалниот сектор.

Од училиштето истакнуваат дека практичните посети се клучни за развојот на младите кадри во земјоделството и ветерината, бидејќи овозможуваат директно учење преку искуство, стекнување нови вештини и зацврстување на тимскиот дух и дружењето меѓу учениците.