Сакате да ги набљудувате ѕвездите - во петок на Широк сокак со телескоп откријте ги тајните на ноќното небо

Europe House Bitola ги поканува сите љубители на науката, астрономијата и љубопитните истражувачи овој петок, на 25 септември, да бидат дел од одбележувањето на „Европската ноќ на истражувачите“ и одблизу да ги откријат тајните на ноќното небо.

Главниот фокус на овогодишниот настан е ставен на астрономијата и набљудувањето на вселената преку телескоп — еден од клучните алатки кои им овозможуваат на научниците да собираат податоци, да прават прецизни мерења, да ги фотографираат далечните галаксии и да откриваат нови светови.

Посетителите ќе имаат уникатна можност одблизу да се запознаат со начинот на кој функционира телескопот, да ги набљудуваат далечните небесни тела и да дознаат како астрономите го дешифрираат универзумот.

„Погледнете ги ѕвездите, истражете, поставете прашање, разбудете ја љубопитноста и дозволете ѝ на науката да ве одведе малку подалеку од секојдневието“, порачуваат од Europe House Bitola.

Настанот е отворен за сите генерации кои сакаат да ја разбудат својата љубопитност, да постават прашања и да уживаат во поинаква, научна перспектива на светот околу нас.