Во рамки на „Преспански јаболкобер 2026“: Одржан Базарот на храна и производи од јаболко со учество на најмладите од Ресен

Во рамките на традиционалната манифестација „Преспански јаболкобер“, денеска во Ресен се одржа Базарот на храна и производи од јаболка, организиран од страна на учениците од основните и средното училиште, како и децата од локалната градинка.

Настанот, кој помина во знак на преспанската традиција, локалните вкусови и младешката креативност, го отвори детското блокче со настапот на најмалите од ЈОУДГ „11 Септември“ – Ресен. Програмата продолжи со музичко-забавни настапи на учениците од СОУ „Цар Самоил“ – Ресен.

Градоначалникот на Општина Ресен, Јован Тозиевски, истакна дека Базарот уште еднаш потврди оти „Преспански јаболкобер“ ги обединува традицијата, младите и локалните производители.

„Овој базар уште еднаш покажа дека Преспанскиот јаболкобер не е само манифестација посветена на нашиот препознатлив преспански плод, туку и празник на нашата заедница, традиција, младите и локалните производители“, порача Тозиевски, упатувајќи благодарност до сите воспитувачи, наставници, ученици и посетители кои придонесоа за успешната реализација на настанот.

Фотографии: Општина Ресен