ЈКП „Водовод“ – Битола: Водата во Битола е безбедна и квалитетна за пиење

ЈКП „Водовод“ – Битола соопшти дека континуирано спроведува строга контрола на квалитетот на водата за пиење, при што во изминатите три години се реализирани повеќе од 16.600 лабораториски анализи кои потврдуваат дека водата што се испорачува до корисниците ги исполнува сите пропишани стандарди за безбедност и квалитет.

„ЈКП „Водовод“ – Битола континуирано се грижи за обезбедување безбедна и квалитетна вода за пиење за жителите на Битола и населените места опфатени со водоснабдителниот систем. Преработката на водата се врши во Филтерската станица Дихово, каде Одделението за санитарна контрола и третман на вода за пиење спроведува 24-часовен мониторинг на процесот на третман и квалитетот на водата. Во периодот 2023–2025 година се извршени вкупно 16.622 лабораториски анализи, од кои 8.786 физичко-хемиски и 7.836 микробиолошки. Тоа значи повеќе од 5.400 анализи годишно или просечно околу 15 анализи дневно.“-информираат од претпријатието.

Контролата се врши на примероци од суровата вода, од финалната вода во Филтерската станица и од бројни пунктови низ целата дистрибутивна мрежа. Дополнителни анализи се спроведуваат и при дефекти, пуштање нови водоводни линии и по пријави од корисниците. Покрај интерната лабораториска контрола, квалитетот на водата редовно се проверува и од надворешни овластени и акредитирани лаборатории, согласно важечките прописи за безбедност и квалитет на водата за пиење.

Испитувањата и контролата на водата се спроведуваат согласно барањата утврдени со Правилникот за барања за безбедност и квалитет на водата за пиење („Службен весник на РМ“ бр. 183/2018).

Според извршените анализи и расположливите извештаи, водата што се испорачува преку водоснабдителниот систем на ЈКП „Водовод“ – Битола ги исполнува пропишаните барања за безбедност и квалитет на водата за пиење.

ЈКП „Водовод“ – Битола продолжува со континуирана контрола и унапредување на процесите, со една основна цел – сигурна, безбедна и квалитетна вода за секој корисник, велат од ова јавно претпријатие.