Над 400 монети откриени кај битолско Црнобуки, дел од времето на Филип Втори и Александар Трети Македонски

Над 400 антички монети се откриени при систематските археолошки истражувања на локалитетот Градиште кај битолското село Црнобуки, а дел од нив потекнуваат од периодот на македонскиот крал Филип II и неговиот син Александар III Македонски. Археолозите оценуваат дека станува збор за едно од најзначајните нумизматички откритија во Македонија во последните години.

Истражувањата ги спроведуваат археолози од Завод и музеј – Битола во соработка со Универзитетот „Кал Поли Хумболт“ од Калифорнија. Според координаторот на проектот, археологот и музејски советник Енгин Насух, меѓу пронајдените примероци има монети со претстава на Зевс, како и монети од времето на Октавијан Август, но и кованици од античките градови Пела, Солун, Амфипол и Дирахион.

Монетите откриени во годинашната истражувачка сезона сè уште се обработуваат, но веќе потврдуваат богата нумизматичка колекција која овозможува да се следи развојот и континуитетот на животот во античката населба низ повеќе историски периоди. Археолозите нагласуваат дека секоја монета претставува важен доказ за трговските врски, економската активност и политичките влијанија во тогашната Македонија.

Локалитетот Градиште се наоѓа на околу 12 километри од Битола и со години е предмет на интензивни археолошки истражувања. Во претходните сезони таму беа пронајдени и сребрена монета со ликот на Александар III Македонски, како и повеќе монети од римскиот републикански период, што дополнително ја потврдува неговата важност како значаен урбан и трговски центар во антиката.

Иако во научната јавност постојат различни претпоставки дека Градиште би можело да биде античките градови Линк или Персеида, археолозите засега се воздржани од конечни заклучоци. Според нив, досегашните откритија сигурно потврдуваат дека станува збор за голем град од македонско-хеленистичкиот период, кој продолжил да егзистира и во римската епоха, а можно е неговите корени да се протегаат уште до бронзеното време. За конечна идентификација ќе бидат потребни дополнителни ископувања и научни анализи.