АПЕЛ ОД ВЉУБЕНИЦИТЕ ВО ПРИРОДАТА: Да се поштеди полската еребица од лов за да се спаси од исчезнување

Состојбата со популацијата на полската еребица во земјава е алармантна, а нејзиниот опстанок е сериозно загрозен, предупредуваат активистите и љубителите на природата. Преку јавен апел споделен на социјалните мрежи од страна на Тоши Трајчев, се повикуваат ловците, надлежните институции и граѓаните итно да преземат мерки за заштита на овој вид птица пред да биде предоцна.

Според апелот, полската еребица – која со децении е симбол на руралните предели и природното богатство на македонските полиња – се соочува со драстично намалување на бројноста. Главните причини за ваквата состојба се уништувањето на нивните природни живеалишта, прекумерната употреба на пестициди во земјоделството, но и неконтролираниот и прекумерен лов.

„Денес, кога нивните јата се сè поретки, време е да се запрашаме: дали спортот и моменталното задоволство вредат повеќе од животот и опстанокот на еден вид? Вистинската љубов кон природата не се мери со бројот на уловени птици, туку со бројот на зачувани животи“, се вели во емотивниот проглас.

Се апелира ловците да покажат етика и целосно да ја поштедат полската еребица од отстрел, а надлежните институции да воведат построги контроли и привремени забрани (мораториум) за лов со цел популацијата да се обнови.

Но важно е исто така и да се подигне свеста за зачувување на биолошката разновидност во руралните средини.

Иницијаторите на овој апел порачуваат дека целта е да им се овозможи на идните генерации да ја гледаат оваа птица како слободно лета над златните полиња, наместо за неа да сведочат само старите фотографии. Притисокот сега се префрла врз ловните здруженија и Министерството за земјоделство, шумарство и водостопанство, од кои се очекува конкретна реакција и законска заштита на овој загрозен вид.

Фотографија: Тоши Трајчев