Граѓаните се информираат како да станат производители на сопствена струја - Соларни саеми на плоштадите во Битола и Прилеп

Денес (16 септември), на Градскиот плоштад во Прилеп, се одржува „Соларен саем Прилеп“ - настан посветен на сончевата енергија, обновливите извори на енергија и можностите за нивна примена во домаќинствата.

Претходно, Битола беше домаќин на Соларниот саем, кој се одржа на плоштадот „Магнолија“, каде граѓаните имаа можност одблизу да се запознаат со придобивките од користењето на сончевата енергија и можностите да станат просумери (производители и потрошувачи на сопствена струја).

Како еден од најголемите центри за производство на електрична енергија во земјава, Битола има клучна улога во процесот на праведна енергетска транзиција. Организаторите истакнаа дека овој процес не смее да остане само институционална тема, туку мора активно да ги вклучи граѓаните преку навремено информирање и практична поддршка.

Преку директни разговори, едукативни материјали и интерактивни активности, посетителите се информираа за инсталација и функционирање на фотонапонски системи во домаќинствата, чекорите потребни да се стекне статусот на просумер и економските и еколошките придобивки од користењето обновливи извори на енергија.

Настанот го организираше Центарот за климатски промени во соработка со здружението „Go Green - Биди Зелен“.

Соларниот саем е дел од проектот „Зајакнување на позитивната перцепција за процесите на праведна транзиција на локално ниво“, кој се спроведува во рамки на пошироката иницијатива за климатска правда координирана од Climate Action Network Europe (CAN Europe), а кофинансирана од Европската Унија.