Од вечерва на полноќ дизелот поевтинува за 4,5 денари и ќе се продава по 100 денари за литар

Поскап бензин и поефтин дизел од вечерва на полноќ кога ќе почнат да важат нови цени на горивата. Бензините поскапуваат за еден денар по литар, додека дизелот поевтинува за 4,5 денари и ќе се продава по 100 денари за литар.

ЕУРОСУПЕР БС-95 ќе чини 100 денари, а ЕУРОСУПЕР БС-98 – 102 денари за литар. Екстра лесното масло за домаќинство поевтинува за три денари и ќе се продава по 111,50 денари за литар, додека мазутот ќе чини 49,882 денари за килограм.

Според Регулаторната комисија за енергетика, со новата пресметка малопродажните цени на нафтените деривати во просек се намалуваат за 1,06 проценти во однос на цените од 21 септември.

Владата денеска донесе и одлука повластената стапка на ДДВ од 10 проценти за дизелот да продолжи да се применува и во оваа пресметка.

Продолжена е и мерката за намалена акциза од четири денари по литар за бензините и дизелот.