Подготвени и кога гасат пожари и кога се натпреваруваат; ДПД „Архангел“ освои второ и петто место на меѓународниот „Kočani Fire Challenge“

Доброволното противпожарно друштво „Архангел“ од Битола оствари забележителен успех на меѓународниот пожарникарски предизвик „Kočani Fire Challenge“, освојувајќи го второто и петтото место во конкуренција од 11 екипи од четири балкански земји.

Битолските доброволни пожарникари настапија со два тима, кои ги одмерија своите способности, издржливост и тимска работа со колеги од Македонија, Србија, Словенија и Бугарија. Првата екипа на ДПД „Архангел“ го освои второто место, при што само две секунди ги делеа од највисокиот чекор на победничкиот пиедестал, додека втората екипа го зазеде високото петто место.

„За нас овие резултати се повеќе од пласман. Тие се потврда за обуката, физичката подготвеност, дисциплината и тимскиот дух што секојдневно ги градиме. Две секунди до врвот се доволно блиску за да знаеме дека можеме, но и доволна причина да тренираме уште повеќе“, истакнуваат од ДПД „Архангел“ – Битола.

Од друштвото упатија благодарност до организаторите и домаќините од Кочани, нагласувајќи дека ваквите настани се од исклучително значење за зајакнување на пожарникарското заедништво, размена на искуства и градење пријателства без граници.