АРСЕНАЛ ОД ПРВА СВЕТСКА ВОЈНА: Пронајдени и подигнати над 1.400 експлозивни средства кај Тумбе кафе во Битола

Голем арсенал на неексплодирани средства кои датираат од Првата светска војна бил откриен и безбедно отстранет во Битола, соопштија од Секторот за внатрешни работи (СВР) Битола.

Според полицискиот билтен, случајот бил пријавен на 08.07.2026 година во 10:38 часот, кога пиротехничар од Дирекцијата за заштита и спасување (ДЗС) Битола известил дека на локацијата викана Тумбе кафе, на просторот на поранешната касарна, е пронајдено огромно количество муниција.

Станува збор за вкупно 1.443 парчиња експлозивни направи, и тоа:

540 минофрлачки гранати

371 рачна бомба

532 тромблонски гранати

Од полицијата информираат дека сите пронајдени експлозивни средства се од периодот на Првата светска војна. Благодарение на брзата и стручна интервенција на пиротехничарот од Дирекцијата за заштита и спасување, целиот арсенал е безбедно подигнат и отстранет од местото, со што е елиминирана потенцијалната опасност за граѓаните.

Битола и нејзината околина, како дел од некогашниот Македонски фронт, и по повеќе од еден век сè уште кријат големи количини неексплодирани убоити средства, кои најчесто се појавуваат при градежни работи или земјоделски активности.

СВР Битола апелира до граѓаните, доколку забележат сомнителни предмети кои наликуваат на експлозивни направи, веднаш да ги известат надлежните служби и воопшто да не ги допираат.