Градскиот воз ќе биде во функција од 1 септември - треба да го олесни патувањето меѓу Битола и Прилеп

Вицепремиерот и министер за транспорт Александар Николоски соопшти дека, и покрај големата штета предизвикана од кражбата и уништувањето на железничката енергетска инфраструктура кај Драчево, планираниот железнички сообраќај нема да биде доведен во прашање.

Тој информираше дека вечерва одржал координациски состанок со директорите на „Македонски железници – Инфраструктура“, Синиша Ивановски, и „Македонски железници – Транспорт“, Дејан Кошутиќ, на кој биле договорени следните чекори за надминување на состојбата.

Според Николоски, градскиот воз ќе започне со работа на 1 септември, како што беше најавено. Тој додаде дека ќе продолжи и редовниот карго железнички сообраќај на Коридорот 10, кој носи најголеми приходи за железницата, како и патничките линии кон Велес, Гевгелија, Прилеп и Битола.

„Градски воз ќе има! Ветивме од 1-ви септември и од 1-ви септември ќе оперира! Редовен карго сообраќај на Коридор 10, кој носи најмногу приход на Железници, ќе има! Патнички возови за Велес, Гевгелија, Прилеп и Битола ќе има!“, дециден е Николоски.

Министерот изрази уверување дека Министерството за внатрешни работи брзо ќе ги открие сторителите на кражбата и тие ќе одговараат за предизвиканата штета. Воедно, му се заблагодари на министерот за внатрешни работи Панче Тошковски за, како што наведе, брзата реакција на полицијата.