Грците точат гориво во Битола и ја зголемуваат потрошувачката на гориво - слично е и во другите погранични градови

Значителната разлика во цените на нафтените деривати меѓу Македонија и Грција ги претвори пограничните градови во омилена дестинација за грчките возачи.

Според локалните оператори на бензинските станици, интересот е континуиран, а најголем прилив се забележува за време на викендите и попладневните часови. Грчките граѓани од Лерин (Флорина) и околните места ја користат секоја можност да ја минат границата, со оглед на тоа што цените на горивата кај нас се забележливо пониски од оние во Грција, каде што високите акцизи и даноци драстично ја покачуваат финалната цена.

„Разликата во цената за еден полн резервоар е повеќе од заштеда – тоа е сериозна заштеда за куќниот буџет. Покрај гориво, пазаруваме и во локалните маркети и користиме угостителски услуги,“ изјавува еден од редовните посетители од Лерин во Битола.

Слична е сликата и во останатите погранични региони, каде странските државјани доајѓаат за да наточат гориво по цени пониски од оние кои ги имаат во своите земји.

Потрошувачката на нафтени деривати во Македонија е зголемена, а според претседателот на Регулаторната комисија за енергетика, Ацо Ристов, значаен дел од зголемената потрошувачка е поврзан со возачи од соседните земји кои доаѓаат во Македонија да точат гориво.

Ристов во емисијата „Ноќно студио“ на 4ТВ рече дека РКЕ не располага со прецизна можност да ја раздвојува домашната од „извезената“ потрошувачка, но податоците покажуваат значителен раст на потрошувачката во изминатиот период, објави 4news.mk.

„Не можеме да направиме раздвојување што значи домашна потрошувачка и да кажеме – ова е извезена потрошувачка. Меѓутоа, имаме параметри дека многу е зголемена потрошувачката на гориво“, рече Ристов.

„Не е тоа последица на домашното трошење, туку баш она на пограничното трошење“, изјави Ристов во емисијата „Ноќно студио“ на 4ТВ, додавајќи дека во текот на летната сезона дополнителен фактор бил и транзитот на патници низ земјава.