Македонците сè уште сакаат во ЕУ, Србите не веруваат дека некогаш ќе влезат во Унијата

Најновото годишно истражување на Европската комисија (ЕК) покажува јасен јаз во расположението и оптимизмот меѓу граѓаните на земјите од Западен Балкан кога станува збор за евроинтеграциите. Додека во Македонија поддршката за членство останува висока, во Србија доминира силен евроскептицизам и песимизам.

Според податоците од истражувањето спроведено меѓу февруари и април, повеќе од 60 проценти од македонските граѓани се изјасниле дека се „за“ пристапување на Северна Македонија во Европската Унија, со што земјата се вбројува во групата со силна поддршка, заедно со Црна Гора и Босна и Херцеговина. Како најголеми ентузијасти во регионот се издвојуваат Албанија со 92% и Косово со 83% поддршка.

Сликата во соседството е драстично поинаква. Во Србија, дури 40 проценти од граѓаните сметаат дека нивната земја **никогаш нема да влезе во ЕУ**. Само 9 отсто очекуваат влез во следните пет години, 24 отсто во рок од пет до 15 години, додека 17 проценти сметаат дека за тоа ќе бидат потребни повеќе од 15 години.

Помалку од една третина од српските граѓани (28%) имаат позитивна слика за Унијата, а доколку сега се одржи референдум, само 31 процент би гласале за членство. Како главни пречки за интеграцијата, Србите ги наведуваат нерешените територијални спорови, недостигот на интерес од самата ЕУ, како и неможноста за исполнување на потребните стандарди. Покрај тоа, истражувањето ја открива и геополитичката ориентација на српското општество – додека во ЕУ веруваат 40% од испитаниците, довербата во Руската Федерација изнесува 58%, а во Кина 56%.

И покрај различните ставови меѓу Скопје и Белград, Европската комисија нотира дека генерално кај партнерите за проширување (вклучувајќи ги и Украина, Грузија и Молдавија) постои силна поддршка.

„Граѓаните јасно гледаат што значат поблиските врски со ЕУ во пракса – посилен мир и безбедност, пошироки економски можности и подобри перспективи за следната генерација“, порача новата европска комесарка за проширување, Марта Кос, коментирајќи ги резултатите од анкетата.