Млади од Пелагонија лансираа кампања „Чувари на шумите“ за заштита на природните богатства

Со пораката дека едно дрво обезбедува дневен кислород за двајца луѓе, младите активисти од Пелагонискиот Регион ја започнаа новата еколошка иницијатива „Чувари на шумите“ (Forest Guardians), насочена кон подигање на јавната свест за важноста и зачувувањето на шумските екосистеми.

Кампањата, инспирирана од природните богатства на Баба Планина и Националниот парк Пелистер, става посебен акцент на одговорното однесување за време на престојот во природа, но и на практичните чекори што секој поединец може да ги преземе – пред сè преку пошумување и едукација.

Во рамките на проектот е пуштена во употреба и специјална едукативна платформа, www.forest-guardians.online, каде што граѓаните и младите можат да се информираат за начините на кои можат директно да придонесат кон заштитата на животната средина.

„Кога стоите во шумите на Пелистер, стоите во природна фабрика за кислород. Секое изгубено дрво значи помалку кислород за сите нас. Младите имаат моќ и одговорност да ја променат состојбата – засадете дрво за подобра иднина!“, порачуваат младите иницијатори на кампањата.

Младинската кампања е реализирана во рамките на проектот „Чувари на шумите“, поддржан од Фондот за зајакнување на младите (Youth Empowerment Fund), Глобалната мобилизација на млади (Global Youth Mobilization – GYM) и Европската Унија (ЕУ). Проектот се спроведува во партнерство со водечките светски младински организации, вклучително и Светската извидничка организација (WOSM), YMCA, YWCA, WAGGGS, Меѓународната федерација на Црвен крст и Црвена полумесечина (IFRC) и Меѓународната награда на Војводата од Единбург.

Проектот го спроведува граѓанската организација Граѓански Патеки во соработка со Асоцијацијата ИКТ Свет. Проектните активности вклучија и теренски активности и соработка со Националниот парк Пелистер. Во проектните активности се вклучени и средношколци од средното училиште Таки Даскало во Битола.