Колкумина во Македонија не одат на работа, а земаат државна плата - им плаќале 88.000 денари за чистење двор

Повик до Јавното обвинителство да реагира за утврдените неправилности во работата на државниот Институт за јавно здравје упати Марија Андоновска, директорка на оваа здравствена институција.

Не оделе на работа, а колегите за 200 евра месечно им ги отчукувале картичките

На прес-конференцијата, по објавувањето на ревизорскиот извештај кој откри бројни злоупотреби во работењето со оваа институција во 2024 година, таа рече дел од луѓето примале плата, а не доаѓале на работа, колеги ги евидентирале дека доаѓаат на работно место, а тие за возврат им давале пари.

На одредени вработени им биле исплаќани дополнителни средства во износ од 44 000 до 88 000 денари месечно за активности поврзани со архивска граѓа и други работни задачи, меѓу кои и одржување на дворот.

Посочи и дека се откриени и случаи на вработувања без положен административен испит, неправилни унапредувања и исплати на различни додатоци на плата. Постоеле и неправилности во системот за наградување на вработените, како и набавки на медицинска опрема која не била потребна, додека недостигала друга неопходна опрема.

Андоновска информираше дека пред таа да дојде на чело на ИЈЗ, се случувало да се склучи договор на дело со веќе вработени лица. Се издавал простор сопственост на ИЈЗ на пекара, нешто што, подвлече таа, било спротивно на Законот. Се правеле јавни набавки што не биле предвидени во годишниот план.