Откриени нови детали за праисторијата на Охридскиот Регион - Продолжуваат истражувањата на „Градиште“ кај Долно Лакочереј

Екипа археолози од НУ Археолошки музеј – Скопје летово успешно ја заврши четвртата сезона од систематските археолошки истражувања на локалитетот „Градиште“ во близина на селото Долно Лакочереј, Охридско. Сезоната донесе нови значајни сознанија за животот и организацијата на праисториските населби во овој дел од земјата.

Досегашните ископувања на овој локалитет открија остатоци од градби, населбински слоеви со богат археолошки материјал кои датираат од доцното бронзено и раното железно време, како и одбранбен бедем од хеленистичкиот период.

Овие откритија имаат исклучително научно значење бидејќи овозможуваат подобро разбирање на развојот и организацијата на крајезерските населби, но и реконструкција на промените во хидролошката историја на Охридското Езеро. Во поширок балкански контекст, добиените податоци придонесуваат кон истражувањата за драматичните социо-економски промени на крајот од бронзеното време — период кој во историјата е поврзан со падот на микенската цивилизација.

Истражувањата се дел од меѓународниот проект „Погранични студии“, кој НУ Археолошки музеј – Скопје го спроведува од 2017 година во соработка со Карловиот универзитет во Прага, НУ Завод и Музеј – Охрид, Германскиот археолошки институт и Чешкиот геолошки институт.

Со овогодинешната теренска кампања раководеше д-р Перо Арџанлиев, кустос советник во Археолошкиот музеј, додека кораководител беше д-р Марек Верчик од Карловиот универзитет во Прага. Во истражувачкиот тим учествуваа и археолозите Илија Бошковски, м-р Драган Таневски, Миле Илоски и Фитни Далипи. Проектот е финансиски поддржан од Министерството за култура.