Крај за „вечните студенти“ и „студентскиот шверц“ - за дрога, алкохол и насилство ќе следи иселување од студентски дом

Построги правила за сместување во студентските домови

Ако до вчера синоним за студентскиот живот во државните домови беа гитарите во ходник, импровизираните забави со евтино пиво во „литарка“ и цимерските договори за тоа кој кого ќе прошверцува преку викенд, новите законски измени се подготвени да стават клуч на оваа романтична (и малку хаотична) ера.

Собранието се подготвува да изгласа правила кои студентските домови повеќе ги приближуваат до строг интернат или воена академија, отколку до места за слободно живеење на младите. Што всушност ги чека студентите од следниот семестар?

Крај за „вечните студенти“ и „студентскиот шверц“

Првиот удар го добиваат оние кои решиле дека факултетот е маратон што треба да трае со децении. Со воведувањето на старосната граница од 30 години, државата децидно им порачува на „вечните студенти“: Време е да дипломирате или да си барате приватно сместување.

Дополнително, се затвора и еден од најстарите бизниси во студентските кругови – „издавањето“ на креветот на друг за пари. Ако ве фатат дека сте ја препуштиле собата на друг за да заработите некој денар, казната е сурова – пакување на куферите и пет години забрана за влез во кој било дом во Македонија.

Чаша алкохол вредна пет години „егзил“

Сепак, најголемата дебата (и паника) меѓу студентите ја предизвикува одредбата за алкохолот. Според новиот текст, внесувањето на едно пиво или шише вино во соба се третира исто како и внесувањето дрога или физичко насилство. Казната? Една до пет години забрана за престој во ниту еден дом во државата.

Ова значи дека студент кој студира во Скопје, а е од Битола или Гевгелија, ако биде фатен со алкохол, ризикува да биде исфрлен на улица, без право да аплицира за дом дури и ако се префрли да студира во Штип или Тетово. Прашањето кое младите веќе го поставуваат по социјалните мрежи е: Дали ова ќе ги спречи да пијат, или само ќе го пресели пиењето во парковите пред домовите и во локалните биртии?

Живот под „лупа“: Од прегласна музика до црна листа

Покрај големите казни, се воведуваат и поедноставни, но досадни правила. Пуштањето гласна музика, неодржувањето на хигиената во собата или непристојното однесување во мензата сега ќе ви донесат писмена опомена.

Иако ова звучи како блага мерка, финтата е што овие опомени ќе ви ги намалат бодовите за следниот конкурс. Една прегласна журка во ноември може да значи дека следната година нема да добиете соба, бидејќи некој „помирен“ студент ве престигнал на ранг-листата.