Пожарот во ресенско вечерва ставен под контрола - Густ чад и натаму над ресенско, пожарот најверојатно подметнат

Пожарот во ресенско вечерва е ставен под контрола. Од Националниот парк Пелистер информираат дека засега е запрено ширењето на огнот, а изгорени се делови од борови насади.

Пожарот што попладнево избувна во Ресенско е подметнат и постоеше опасност да се прошири кон Пелистер, изјави директорот на Дирекцијата за заштита и спасување Стојанче Ангелов во текот на денот.

Поради опасноста од негово ширење кон Националниот парк „Пелистер“ ангажирани беа Ер-трактори и дополнителни тимови на Дирекцијата за заштита и спасување (ДЗС).

Ангелов посочи дека пожарот започнал покрај неколку овоштарници со јаболка, а додека пожарникарите се обидувале да го стават под контрола, се појавила подолга огнена линија на друга локација, што, според него, укажува дека пожарот е намерно подметнат.

– Денес попладне изби тежок пожар во атарот на село Макази, Општина Ресен. Пожарот започна покрај неколку овоштарници со јаболка, на најмалку две локации истовремено. Додека пожарникарите се обидувале да го стават под контрола, се појавил оган подалеку од таму, и тоа подолга огнена линија, што укажува на тоа дека овој пожар е намерно подметнат – вели Ангелов. Огнот гореше меѓу селата Бела Црква и Подмочани, каде што беа зафатени борова шума и ниска вегетација. Првичните информации беа дека пожарот се движи во правец на туристичката населба Претор.

Инаку, се уште има густ чад над поширокото подрачје на Ресен.