„Рурална жена - Силата на Пелагонија“: Доделени признанија за жените кои го движат современото земјоделство

Битола денес беше домаќин на „РУРАЛНА ЖЕНА-СИЛАТА НА ПЕЛАГОНИЈА“ манифестација посветена на руралната жена, нејзината сила, знаење, традиција и визија за иднината на Пелагонија.

На настанот кој го организираше здружението „Современо земјоделство“ преку панел дискусии беа отворени темите „ Можности и предизвици на дигиталното земјоделство„ и „Жената-двигател на современото земјоделство и руралниот развој“.

На манифестацијата присуствуваше и Градоначалникот на Битола Тони Коњановски, кој во својот поздравен говор рече дека руралната жена со својата активност и ангажман во земјоделието има значаен придонес во земјоделството, локалната економија и развојот на руралните средини.

„Во време на дигитална ера и престројување кон современите начини на работа и во делот на земјоделското производство, сепак традиционалните начини на производство не прават извонредни во оваа дејност, а руралната жена е уникатна приказна во тој дел, каде само таа може да го направи она што денеска има посебна вредност, а тоа се производите подготвени од вредните раце и нејзината умешност, научени лекции од нивните баби, мајки“, истакна градоначалникот Коњановски.

На манифестацијата беа доделени признанија на жени кои придонесуваат кон развојот на агросекторот.