Секој граѓанин може да пријави еколошки проблем на ecoalarm.mk

Активностите во рамките на еколошкиот проект „Eco Alarm“ продолжуваат со полн ек, овојпат фокусирани на еден од најгорливите проблеми во регионот – нелегалното одлагање отпад. Младите активисти од Пелагонискиот регион веќе се на терен и активно ги мапираат дивите депонии, но организаторите нагласуваат дека во оваа битка за чиста животна средина е потребна помош од секој поединец.

Со цел да се создаде прецизна и сеопфатна еколошка мапа, во функција е ставена веб-платформата www.ecoalarm.mk. Преку неа, процесот на пријавување е целосно отворен и достапен за јавноста – сега секој граѓанин кој ќе забележи дива депонија или еколошко жариште во Пелагонија може едноставно и брзо да го пријави локалитетот.

Собраните податоци и мапираните точки ќе служат како јавен аларм за заедницата, но и како клучна основа за понатамошни акции за чистење и соработка со надлежните институции кои се задолжени за менаџирање со отпадот.

„Чистата животна средина е наша заедничка одговорност, а дигиталните алатки ни даваат моќ на сите нас да бидеме чувари на природата. Ги повикуваме сите граѓани на Битола и Пелагонија да бидат нашите очи на терен. Кога ќе забележите депонија, не поминувајте покрај неа – пријавете ја на ecoalarm.mk“, порачуваат младите активисти.

Проектот „Еко аларм“ е поддржан од Фондот за зајакнување на младите (Youth Empowerment Fund), Глобалната мобилизација на млади (Global Youth Mobilization - GYM) и Европската Унија (ЕУ), во партнерство со големите глобални младински мрежи. На овој начин, преку спој на технологијата и граѓанскиот активизам, младите од Пелагонија го трасираат патот кон позелена и поодржлива иднина.