Слободни места за 1288 бруцоши на Универзитетот „Св. Климент Охридски“-Битола - вториот уписен рок почнува на 9 септември

Универзитетот „Св. Климент Охридски“-Битола во вториот уписен рок кој почнува на 9 септември има слободни места за 1288 бруцоши, од нив 523 редовни, 424 студенти со партиципација во студирањето и 341 кандидат кои ќе се определат за категоријата вонредно студирање.

Најголем број студенти ќе можат да се запишат на Техничкиот факултет каде се огласени 269 места за сите насоки, а најмалку за насоките мехатроника и инженерство за заштита на животната и работната средина.

На Факултетот за информатички комуникациски технологии ФИКТ слободни се 174 места, на Педагошки факултет 190, на Факултетот за биотехнички науки слободни се 66 и на Ветеринарен факултет има 15 слободни места.

На 9, 10 и 11 септември втор уписен рок ќе се реализира и на факултетите, членки на УКЛО, лоцирани во Скопје, Кичево, Велес, Прилеп и во Охрид.

На Факултетот за безбедност во Скопје слободни се уште 66 места, на Правен факултет во Кичево 59, Технолошко-технички факултет во Велес 92, Економски факултет во Прилеп 121 и на Факултетот за туризам и угостителство во Охрид може да се запишат уште 148 студенти во сите категории за студирање.

Втор уписен рок ќе биде организиран и на Високата медицинска школа во Битола каде има уште 88 места за студенти на прв циклус студии.