Повредено магаренце 3 дена лежеше на пат во Прилеп - за среќа го спасија хуманитaрци од Скопје, сега е на безбедно и прима терапија

Три дена никој не му помогна на повреденото магаре кај Маркови кули, кое за среќа беше спасено во 3 часот по полноќ од скопски активисти.

Хуманитарна драма со среќен крај, но и со горчлив вкус за емпатијата на граѓаните, се одвиваше изминативе денови во Прилеп. Магаренце во тешка здравствена состојба, кое речиси 3 денови лежело во невидени маки и болки на патот под Марковите кули, конечно е спасено благодарение на брзата и експресна реакција на активистите од Скопје.

Иако Здружението за заштита на животни „Шанса за живот“ од Прилеп упати итен апел до локалното население за пронаоѓање привремена штала, превоз и помош, одзивот од прилепчани бил поразителен. Животното три дена било одминувано од минувачите пред чии очи полека умирало.

Експресна спасувачка акција во три часот наутро

Откако веста и фотографиите се проширија на социјалните мрежи, алармот стигна до Скопје. Активистите Кемал и Бојана од организацијата „Happy Shelter“, без двоумење се упатиле кон Прилеп и околу 3 часот по полноќ успешно го презеле изнемоштеното животно за да му пружат соодветна ветеринарна нега.

Од здружението „Шанса за живот“ не го криеја својот револт кон пасивноста на своите сограѓани. „Додека магаренцето во тешки маки и болки умираше, а прилепчани без мува да ги лази го одминуваа и мирно си спиеја, околу 3 часот наутро тоа е преземено од Happy Shelter Скопје! Голема благодарност до Кемал и Бојана за нивната експресна реакција. А на прилепчани срам и јаз`к да ни е – освен за мајтап и оговарања, за ништо друго не нè бидува! Сега раат спијте, исто како што спиевте изминатите три дена додека животното ви беше пред нос, пред куќи“, порачуваат револтираните активисти од Прилеп.

Благодарност до хуманите поединци

Од здружението упатија јавна благодарност до неколкуте поединци кои сепак покажале доблест во оваа ситуација и тоа до лицето кое прво испратило фотографии и ја алармирало јавноста за локацијата на магаренцето, до Татјана Ололовска Ристевска, која максимално се ангажирала и помогнала на секаков можен начин во координацијата, како и до стручниот и пожртвуван тим на Happy Shelter Скопје, кои покажаа дека хуманоста не познава граници и километри.

Магаренцето во моментов е на безбедно, каде прима соодветна терапија, а овој настан останува како сериозна лекција и поука за колективната емпатија и грижата кон животните кои не можат самите да побараат помош.